Ciljeta rikthehet si fotomodele

Titulli: Ciljeta rikthehet si fotomodele Fri Sep 05, 2008 12:45 am

Ka
ditur gjithnjë të godasë në shenjë,një dhunti e lindur kjo e “Lolitës”
së skenës shqiptare. Por kësaj radhe, për çudinë të gjithëve, është
mërzitur me joshjen dhe sharmin që i ka falur nëna natyrë. Ajo nuk do
të jetë më “Lolita” e askujt. Ky është lajmi më i fundit që vjen nga
kampi i këngëtares.Edhe pse 2008-ta ka qenë një vit vërtet i mbarë për
të, jo vetëm në muzikë, por edhe përtej skenave e koncerteve ku ka
marrë pjesë, mesa duket historia e saj e dashurisë ka pësuar “krisjen”
e madhe. Çiljeta ka vendosur të mos jetë më “Lolitë”, për të ndryshuar
kryekëput jetën e saj. Pas “Dorëheqjes” dhe “Puçi, puçi”, “sexy-girl”
është vënë në kërkim të një dashurie që e meriton femrën fatale të
kohëve moderne. Mos u trembni nga sa shkruhet më lart, sepse në
realitet ajo po e shijon me të gjitha mundësitë historinë e dashurisë.
Madje romanca e këngëtares alla-“Romeo dhe Çiljeta” është në kulmin e
vet, duke qenë se sapo kanë kremtuar përvjetorin e tretë. Gjithë faji
është i Rozi Radit, e cila ka shkruar tekstin e këngës më të fundit të
realizuar nga Xhilaga me titull “Lolita”. Një gjë të tillë e pohon edhe
vetë këngëtarja në një prononcim për “Korrierin”. “Sapo kam përfunduar
këngën e radhës me titull “Lolita”, që është një bashkëpunim me Adrian
Hilën dhe tekst të Rozana Radit. Fabula e këngës bën fjalë për një
vajzë që ka kontribuar shumë në dashuri dhe është zhgënjyer. Kështu,
unë i them djalit që nuk jam më “Lolita” e tij e se çdo gjë ka marrë
fund. Një realizim që i përshtatet stilit tim dhe që shpresoj të
vlerësohet”, vijon më tej Çili. Si gjithmonë seksi, por këtë herë më
ekstravagante dhe në stilin e Brigitte Bardot, bukuroshja më e kërkuar
e ekranit ka luajtur rolin që deri diku e përfaqëson vetë atë, duke
qenë një lozonjare e lindur. Edhe pse nuk ka ende një videoklip, kënga
ka filluar të dëgjohet pa pushim në “You Tube”. Por përveç kësaj, vajza
joshëse e skenës ka një tjetër plan, edhe më të rëndësishëm se ky i
pari. Ajo do të jetë imazhi i kalendarit të vitit 2009, për të gjithë
muajt, çka vërteton edhe njëherë se efekti “Çiljetë” është ende një
imazh që shet. Dhe bukuroshja seksi e di mirë këtë. Përveç koncerteve
dhe ftesave për të kënduar në bregdetin e Shqipërisë, por jo vetëm, ajo
përgatit sfidën e radhës si modele. Me pak fjalë, një “sexy-girl” që
ndryshe nga sa thuhet lart e poshtë, po jeton periudhën më të artë të
jetës së saj. Aq me tepër që tani synimet e saj rrahin në një tjetër
vend. Është albumi i paralajmëruar prej shumë muajsh, që pret të
promovohet nga fundi i vitit. Më shumë se dhjetë kompozime të reja dhe
disa videoklipe që ditët e fundit kanë zënë pjesën më të madhe të kohës
së lirë të saj gjenden aty. Një synim mbase pak i guximshëm, por që i
vjen fort për shtat një vajze ambicioze si Çiljeta, e cila gjer tani i
ka mbajtur premtimet që ka dhënë. Qoftë edhe duke thyer shumë tabu apo
skepticizëm, të cilit nuk i shpëtoi kur këndoi për herë të parë.
Shembulli më i fundit është dueti me Ingridin ,“Puçi, puci”, që shfaqet
tërë kohës në stacionet televizive.