Ingrid Gjoni, Femra me e paguar

---

Vera
e sivjetshme mbetet më e lodhshmja, por dhe më fitimprurësja për
këngëtaren seksi, Ingrid Gjoni. Të dielën në orën 04:00 të mëngjesit
është kthyer nga një natë e gjatë koncerti në Velipojë.I është dashur
të udhëtojë kilometra të tërë, por sërish, ka pak adrenalinë në çdo
ditë për Ingridin. “Për pak do të nisem në Berat. Kam një tjetër
koncert dhe më duhet të udhëtoj, pasi pasdite duhet të jem sërish në
Tiranë, kam plane të tjera në axhendë, kryesisht koncerte”, rrëfen
ajo.Ndryshe nga verat e tjera, kjo e sivjetshmja për të ka një temp
tjetër, madje jo vetëm në fundjavë siç ka ndodhur rëndom,por edhe gjatë
ditëve të tjera. “Mund të them që tri vitet e fundit kanë qenë më të
suksesshmet e karrierës time. Ndihem shumë e vlerësuar dhe kjo më bën
të punoj më shumë.Kjo ka qenë edhe arsyeja që vetëm këtë vit kam hedhur
në treg 3 këngë dhe po kaq videoklipe të reja”, shpjegon motra e vogël
e familjes Gjoni. Me gjithë itineraret e gjata dhe netët pa gjumë,
fakti që ajo është në krye të listës së femrave më të paguara artiste e
bën të ndihet e vlerësuar. “Jam artiste dhe s’mund të tregoj shifra,
pasi ato nuk bëhen publike. Të gjitha kontratat që kam, janë bërë vetëm
për vetëm me pronarët e lokaleve ku kam kënduar apo pritet të këndoj.
Megjithatë, po ju them që ndihem shumë e kënaqur me pagesat, duke qenë
me koleget e tjera në listën e më të paguarave”, tregon Ingridi, duke
mos rrëfyer asnjë shifër konkrete, as edhe ndonjë krahasim me koleget e
saj. Edhe pse i është dashur të qëndrojë mbi timon për orë të tëra në
udhëtime të gjata,për bukuroshen e “Puçi-Puçi”, në këtë sezon ia vlen
që të lodhesh dhe të fitosh.
TURNEU VEROR
Kosova, Maqedonia dhe
Mali i Zi, disa nga qytetet kryesore evropiane, si dhe dy koncerte të
tjera në Amerikë, janë të shënuara me ngjyrë të kuqe në kalendarin e
Ingridit për këtë sezon. ”Turneu në Amerikë ishte planifikuar më
parë,por u shty për pak javë më vonë, në një koncert do të jem e ftuar
me Çiljetën, ndërsa në tjetrin vetëm”, pohon këngëtarja sharmante. Ajo
pohon se plazhet e Shqipërisë janë stacionet ku edhe i është dashur që
të udhëtojë më shumë, madje në disa prej tyre jo një apo dy herë, por
deri në katër koncerte brenda një kohe të shkurtër, kjo falë
preferencave që kanë fansat. Velipoja ka qenë qyteti i fundit, por
Shëngjini, Saranda, Vlora dhe shumë qytete të tjera, pritet që të
ofrojnë për Ingridin, net të lodhshme mbi skenë, por edhe momente që e
bëjnë të ndihet me plot adrenalinë.
PUSHIMET
Nuk mund të gjejë
sado pak kohë për të pushuar, kjo për shkak të impenjimeve, rrëfen
këngëtarja bukuroshe, teksa ka planifikuar që maksimumi ndonjë fundjavë
të pushojë me familjen e saj. “Familja për mua është shumë e çmuar. Kam
vendosur që të gjej pak kohë dhe të shkëputem disa ditë për të pushuar
me mamin dhe me motrat”tregon Ingridi. Edhe pse nuk e ka vendosur ende
se ku do të shkojë me familjen,pohon se do të preferonte plazhet e
vendit, edhe pse në të gjitha ka qenë së fundmi e ftuar si artiste. “E
di që kjo verë ka qenë për mua e lodhshme dhe do të jetë e tillë deri
në fund,por do të gjej gjithmonë pak kohë për veten dhe familjen ”,
përfundon Ingridi dhe pasi ka lëvizur çelësin e makinës,ka nisur
udhëtimin e saj të radhës.