Rezart Taçi: Ja si e solla Milanin në Shqipëri

Rezart Taçi: Ja si e solla Milanin në Shqipëri

Pas “shpërthimit” të lajmit se Milani do të vijë më 14 tetor në
Tiranë për të zhvilluar një ndeshje miqësore, Rezart Taçi, njeriu që
bëri të mundur këtë marrëveshje, tregon detajet e bisedimeve.

Të hënën ai përfundoi akordin me drejtuesit më të lartë të Milanit, mes të cilëve ishte edhe zv/presidenti Adriano Galini.



“Mund të konfirmoj se marrëveshja me Milanin është hedhur e zezë në të
bardhë. Kjo është arritur pas disa muajsh negociatash, duke realizuar
ëndrrën time personale, që të kemi këtë skuadër të madhe në vendin
tonë, por dhe ëndrrën e të gjithë sportdashësve shqiptarë”, tha kreu i
kompanisë “Taçi Oil”, që është partneri shqiptar i klubit kampion bote.



“Milanin nuk e kishte penguar asgjë për të ardhur që më parë, por duhet
theksuar se në këto vitet e fundit sporti shqiptar ka pasur një hov
cilësor dhe kjo është një nga arsyet që drejtuesit italianë pranuan.



Kjo ishte një prej kërkesave kryesore. Pas negociatave gjithçka u përputh më së miri dhe arritëm të binim dakord”.



Zoti Taçi konfirmoi edhe se Tirana do të jetë skuadra që do të luajë më
14 tetor përballë skuadrës së drejtuar nga Karlo Ançeloti:



“Zgjodhëm Tiranën, pasi është një ndër skuadrat më prestigjioze të
Shqipërisë. Ata kanë një histori të pasur dhe e meritojnë një prestigj
të tillë”.



Takimi do të zhvillohet në stadiumin “Qemal Stafa”, në orën 19:00 dhe pritet që interesimi i tifozerisë të jetë i madh.



Jo vetëm i asaj kryeqytetase, por nga mbarë vendi.



Organizatori zbuloi edhe çmimin e biletave për një vend në stadium:
“Çmimi i biletave do të jetë njësoj me ato të përfaqësueses në ndeshjet
kur luhet me kundërshtarë të nivelit të lartë”.



E përkthyer ndryshe, një vend në tribunën qendrore do të kushtojë 5
mijë lekë të reja, në tribunën “D2” 3 mijë lekë, ndërsa në “D1” dhe
“D3” 2 mijë lekë.





E veçanta e asaj mbrëmjeje është se do të ketë edhe një donacion për bamirësi.



“Milani së bashku me kompaninë tonë, menduan që, përveçse të jetë një
ndeshje futbolli, 14 tetori të ketë edhe një destinacion për bamirësi,
përfundoi Taçi.



Pas ndeshjes, klubi italian dhe ‘Taçi Oil’ do t’i dhurojnë 100 mijë euro ‘UNICEF’-it.

Spoiler: